ആരാണാ “മയലാളി”?

പണ്ടൊരിടത്തു ഒരാശാരിയുണ്ടായിരുന്നു -- ടി ആശാരിയെ, ആ നാട്ടിലൊരാളൊരു കട്ടിലു പണിയാന് വിളിച്ചു. മനസ്സില്ലാ മനസ്സോടെയെങ്കിലും കഥാപാത്രം അവിടെ ജോലിക്കും ചെന്നെത്തി. പുറത്തെ മാവിനരുകില്, വൃത്തിയുള്ള കുറച്ചു സ്ഥലം നോക്കിയെടുത്ത് ആശാരി പണിയാരംഭിച്ചു. കുറേ ദിവസങ്ങള്ക്കു ശേഷം അങ്ങോര് കട്ടിലിന്റെ പണിയും തീര്ത്തു.

ഒറ്റക്കുഴപ്പം മാത്രം -- കട്ടിലു പണിതതു്, മാവിനടുത്തുണ്ടായിരുന്ന കവുങ്ങിനു് ചുറ്റുമായിട്ടായിരുന്നു. പുരയ്ക്കകത്തേക്കു കട്ടിലു കൊണ്ടു പോകണമെങ്കില്, ഒന്നുകില് കവുങ്ങു് മൂടോടെ വെട്ടണം, അല്ലെങ്കില്, കട്ടില് പൊളിച്ചു കവുങ്ങിനു പുറത്തെടുത്തിട്ട്, വീണ്ടും അസ്സംബിള് ചെയ്യണം.

ഈ കഥ എന്തിനാണെന്നു ഇനി:

സാഹയുടെ ചിത്രത്തിനു മേലെ എന്റെവക കലാപരിപാടികള്ക്കു മാറ്റു് പോരാതെ വന്നേക്കും എന്നതിനാലാണു് ഒരാളോടു് സഹായിക്കാന് ആവശ്യപ്പെട്ടതു്. നാളു കുറേയായിട്ടും ഒന്നും കാണാതെ വന്നപ്പോള്, തനിയെ ആവുന്നതു പോലൊക്കെ ഒപ്പിച്ചൊരെണ്ണം:




അതിലേക്കുള്ള അധ്വാനമെല്ലാം കഴിഞ്ഞു് ഒടുവില്‍, ഇന്നലെയുണ്ടു് ദാ വരുന്നു ഒരു മെയില്, തീര്ത്തിട്ടുണ്ട്, നോക്കൂ എന്നൊക്കെ പറഞ്ഞു്.

നോക്കിയപ്പോഴോ? സംഭവം സുന്ദരം സുരഭിലം -- പക്ഷെ തനിമലയാളം ബ്ലോഗുകള്"-ക്കു പകരം, "തനിമയലാളം ബ്ലോഗുകള്" എന്നൊരൊറ്റ കുഴപ്പം മാത്രം.




ടി മയലാളി ആരാണെന്നു് ആര്ക്കെങ്കിലും ഊഹിക്കാമോ?

തമാശല്ലാത്തതു്:

മലയാളം പാഠപുസ്തകം: പണ്ടത്തെ മലയാളം പാഠപുസ്തകം (കേരള സര്‍ക്കാര്‍ സിലബസ്സ്) , ആരുടെയെങ്കിലും പക്കലുണ്ടോ? തെങ്ങിന്‍ തലപ്പുകളുടെ ഇടയിലൂടെ ഒഴുകുന്ന നദിയും, അതിലൂടെ പോകുന്ന ഒരു വഞ്ചിയുടെയും ചിത്രമുള്ളതു്? ഉണ്ടെങ്കില്‍, ആ കവര്‍ ചിത്രത്തിനെ ഒന്നു സ്കാന്‍ ചെയ്തോ മറ്റോ ആരേലും ഒന്നു പോസ്റ്റുമോ? കാല്പനികതയുടെ ബാലപാഠങ്ങളില്‍ ചിലതു് പഠിച്ചതും, ആ നദിയുടെ തീരത്തെവിടെയോ ഞാനും, എന്റെ വീടുമുണ്ട് എന്ന സങ്കല്പത്തിലൂടെയുമാവണം. കണ്ടു മടുത്തുവെന്നു ഒരിക്കലും തോന്നിയിട്ടില്ലെങ്കിലും, അതൊന്നും സൂക്ഷിച്ചു വെയ്ക്കാന്‍ കഴിഞ്ഞില്ല. വീണ്ടും ഒന്നു കാണണമെന്നൊരാശ. നന്ദി.